अर्थलगानी

काठमाडौँ। व्यावसायिक घराना लक्ष्मी ग्रुपले आधा सेञ्चुरी अर्थात ५० वर्ष पुरा गरेको छ। बुद्धिबहादुर श्रेष्ठ तथा गणेशबहादुर श्रेष्ठले २०३० साल पुस ५ गते स्थापना गरेको लक्ष्मी मिठाई भण्डार मौलाएर लक्ष्मी समूहमा रूपान्तरित भई अहिलेसम्म आइपुग्दा ५० वर्ष पुरा गरेको हो। लक्ष्मी ग्रुपले सन् १९७३ मा मिठाई उत्पादनबाट व्यवसायिक यात्रा थालेको थियो। हाल यस ग्रुपले कन्फेक्सनरी, डेरी, प्लाष्टिक, अटोमोबाइल, इलेक्ट्रोनिक्स र स्टील लगायत क्षेत्र पकड जमाएर बसेको छ। नेपाली बजारमा लक्ष्मी ग्रुपले हुन्डाई, एसएमएल इसुजु र बीएमडब्ल्यु कार तथा टोटल लुब्रिकेन्टलगायत विभिन्न अटोमोबाइल सम्बद्ध व्यवसाय गर्दै आएको छ । लक्ष्मी कमर्सियल भेइकलले एसएमएल इसुजुका लाइट र मेडियम कमर्सियल भेइकल विगत ३४ वर्ष देखि नै बिक्री–वितरण गर्दै आएको छ । सन् २००९ फेब्रुअरी देखि लक्ष्मी इन्टरकन्टिनेन्टलमार्फत हुन्डाईका कार बिक्री गर्दै आइरहेको यो ग्रुपले सन् २०२० देखि बीएमडब्ल्युका सवारी साधन बिक्री–वितरण लक्ष्मी प्रिमियम मोटर्समार्फत गरिरहेको छ । यसैगरी लक्ष्मी ग्रुपले लक्ष्मी ल्युब आयलमार्फत टोटल लुब्रिकेन्ट र लक्ष्मी अटोकम्पमार्फत टाटा ग्रिन ब्याट्रीको समेत कारोबार गर्दै आएको छ । त्यसैगरी लक्ष्मी ई–मोबिलिटीमार्फत हिरो इलेक्ट्रिक स्कुटरको समेत बिक्री–वितरण गरिरहेको छ । आगामी दिनमा कृषि र होटल क्षेत्रमा लगानी गर्ने योजना रहेको ग्रुपको भनाइ छ । लक्ष्मी ग्रुपलाई अहिले दोस्रो पुस्ता अर्थात गणेश बहादुर श्रेष्ठका चार सन्तान सुनिल, अञ्जन, निरञ्जन र निराकारले हाँकिरहेका छन् । उनीहरू सबै ग्रुपका अध्यक्ष गणेशबहादुर श्रेष्ठको ‘भिजन’ अनुसार अगाडि बढिरहेका हुन्छन्।