काठमाडौं । गोरखाको चुमनुब्री गाउँपालिकाले मनास्लु संरक्षण क्षेत्र (एमक्याप) भित्र आउने स्वदेशी र विदेशी पर्यटकसँग नयाँ शुल्क लागू गर्ने निर्णय गरेको छ। पालिकाले आगामी दिनहरूमा विदेशीसँग प्रतिव्यक्ति १ हजार रुपैयाँ र नेपालीसँग २ सय रुपैयाँ शुल्क उठाउने बताएको हो।
चुमनुब्री गाउँपालिकाका प्रमुख प्रशासकीय अधिकृत मनोज लामिछानेका अनुसार, यो निर्णय भदौ २० गते गरिएको छलफलको परिणाम हो। छलफलमा जनप्रतिनिधि, राजनीतिक दल, पर्यटन व्यवसायी र अन्य सरोकारवालाहरूको सहभागिता रहेको थियो।
अहिलेसम्म, एमक्याप क्षेत्रमा जान चाहने पर्यटकसँग राष्ट्रिय प्रकृति संरक्षण कोष र अध्यागमन विभागले शुल्क उठाउँदै आएका थिए। तथापि, पालिकाले आफ्नो अधिकार क्षेत्रमा शुल्क उठाउन नपाउँदा अपेक्षित कर संकलनमा समस्या आएको र कोषले उठेका शुल्कको उचित बाँडफाँट नगरेको बताएको छ।
पालिकाले उठाएको पदयात्रा शुल्कबाट चुमनुब्री र मनास्लु संरक्षण क्षेत्रको वातावरण संरक्षण र पर्यटन प्रवर्धनका लागि लगानी गरिनेछ भनेको छ।
यो निर्णयले पालिकालाई स्थानीय आवश्यकताहरू पूरा गर्न र पर्यटन क्षेत्रलाई थप सुदृढ बनाउन मद्दत गर्ने विश्वास गरिएको छ।
लेखकको बारेमा
प्रतिक्रिया