काठमाडौं,– नेपाल स्टक एक्सचेन्ज (नेप्से) को दैनिक चार्टमा बिहीबार ‘ड्रागनफ्लाई डोजी’ क्यान्डलस्टिक देखिएको छ। यस्तो आकृतिले बजारको धारणा परिवर्तन हुने संकेत दिन्छ, जसले लगानीकर्ताहरूका लागि चासोको विषय बन्न सक्छ।

बजारको दिशा कता?

‘ड्रागनफ्लाई डोजी’ तब बन्छ जब सेयरको खुल्ने, उच्च र बन्द मूल्य उस्तै हुने तर न्यूनतम मूल्य निकै तल झर्ने अवस्था आउँछ। यो क्यान्डल अंग्रेजी ‘T’ आकार को हुन्छ, जसले दिनभर बिक्रेताको हावी भए पनि अन्तिम समयमा क्रेताहरू बलियो देखिएको संकेत गर्छ।

विश्लेषकहरूका अनुसार, लामो समयको घट्दो प्रवृत्ति (डाउनट्रेंड) मा यस्तो क्यान्डल देखा परेमा बजारले बुलिस ट्रेन्ड लिने सम्भावना हुन्छ। इतिहासलाई हेर्दा, यस्तै अवस्थाहरू बजार उकालो लाग्ने संकेतको रूपमा देखिएका छन्।

तर, यदि बजार पहिले नै बढ्दो प्रवृत्ति (अपट्रेंड) मा रहेर यस्तो क्यान्डल बन्यो भने, बियरिस ट्रेन्डमा जाने सम्भावना पनि रहन्छ।

कारोबारमा गिरावट, तर बजार बलियो

बिहीबारको कारोबार अघिल्लो दिनभन्दा झण्डै २ अर्ब रुपैयाँले कम देखिएको छ। यो संकेतले बजारमा नाफा बुकिङ भइरहेको देखाउँछ। तर, विभिन्न प्राविधिक इन्डिकेटरहरूले बजार अझै बलियो रहेको देखाइरहेका छन्।

अब के होला?

बजार केही सामान्य करेक्सन भई स्थिर रहने सम्भावना भए पनि हालसम्मका संकेतहरू नेप्से बलियो हुँदै गएको देखाउँछन्। त्यसैले लगानीकर्ताले बजारको आगामी गतिविधिलाई नजिकबाट हेर्नु जरुरी छ।