काठमाडौं, चैत ७ । सरकारले नेपाल विद्युत प्राधिकरणको कार्यकारी नेतृत्वमा फेरबदल गर्दै कुलमान घिसिङलाई हटाउने निर्णय गरेको छ। अब प्राधिकरणको नयाँ कार्यकारी निर्देशकका रूपमा हितेन्द्रदेव शाक्य नियुक्त भएका छन्।

मन्त्रिपरिषद्को निर्णयमा  कुलमान हटाइएको र शाक्य पुन नेतृत्वमा
सोमबार साँझ बसेको मन्त्रिपरिषद् बैठकले कुलमान घिसिङलाई प्राधिकरणको नेतृत्वबाट हटाउने निर्णय गरेको हो। यससँगै सरकारको विश्वास हितेन्द्रदेव शाक्यतर्फ गएको देखिन्छ।

यसअघि २०७७ माघ २७ गते पहिलो पटक शाक्यलाई कार्यकारी निर्देशकको जिम्मेवारी दिइएको थियो। तर, २०७८ साउनमा उनलाई जल तथा ऊर्जा आयोगमा सचिवसरहको पदमा सरुवा गर्दै कुलमान घिसिङलाई पुनः प्राधिकरणमा ल्याइएको थियो।

के शाक्यलाई दीर्घकालीन जिम्मेवारी ?
शाक्यलाई दोहोर्‍याएर नियुक्ति दिइएको भए पनि प्राधिकरणको नेतृत्वमा फेरबदल भइरहने प्रवृत्तिले दीर्घकालीन ऊर्जा रणनीतिमा प्रभाव पार्ने विज्ञहरू बताउँछन्। साथै, शाक्य प्रधानमन्त्री केपी शर्मा ओलीका सालोसमेत भएकोले यो निर्णय राजनीतिक समीकरणकै हिस्सा भएको अनुमान गरिँदैछ।

अब शाक्यको नेतृत्वमा नेपाल विद्युत प्राधिकरणले ऊर्जा आपूर्ति सुधार, निर्यात प्रवर्द्धन र संस्थागत स्थायित्वका लागि कस्तो रणनीति अख्तियार गर्छ भन्ने चासोको विषय बनेको छ।