भैरहवा – महालक्ष्मी विकास बैंकले आफ्ना ग्राहकहरूलाई आपतकालीन वित्तीय आवश्यकतामा सहज समाधान दिने उद्देश्यसहित भैरहवा शाखाबाट ‘सुन कर्जा सेवा’ सुरु गरेको छ।

बैंकका सञ्चालक राहुल अग्रवालको प्रमुख आतिथ्यमा तथा प्रदेश प्रमुख र शाखा प्रबन्धकको उपस्थितिमा विशेष कार्यक्रमबीच सेवा शुभारम्भ गरिएको हो। बैंकका अनुसार, यस सेवामार्फत ग्राहकहरूले कम ब्याजदर, छरितो प्रक्रिया, र सुरक्षित वित्तीय व्यवस्थापनको सुविधा पाउनेछन्।

सुन कर्जा : छरितो, भरपर्दो, र सहज सेवा

महालक्ष्मी विकास बैंकले ग्राहकलाई न्यूनतम ब्याजदरमा छिटो र सरल रूपमा कर्जा उपलब्ध गराउने बताएको छ। ग्राहकले भैरहवा शाखाबाट सुन धितो राखी तुरुन्तै कर्जा प्राप्त गर्न सक्ने छन्, जसले आकस्मिक खर्च तथा वित्तीय आवश्यकतालाई सहज बनाउनेछ।

नवीनतम सेवा विस्तार गर्दै बैंक

बैंकले ग्राहक सुविधालाई ध्यानमा राख्दै डिजिटल बैंकिङ प्रणालीलाई समेत सशक्त पार्ने योजनामा रहेको छ। हालै परिष्कृत गरिएको ‘महालक्ष्मी स्मार्ट साथी’ मोबाइल एप्लिकेसनमार्फत आधुनिक, सुरक्षित, र सहज डिजिटल बैंकिङ सेवा उपलब्ध गराइरहेको बैंकले जनाएको छ।

नयाँ सेवासहित वित्तीय पहुँच विस्तार

ग्राहकको आवश्यकतालाई प्राथमिकता दिँदै नवीनतम वित्तीय सेवाहरू विस्तार गर्ने प्रतिवद्धता व्यक्त गर्दै बैंकले आगामी दिनमा समेत ग्राहकलाई केन्द्रमा राखेर वित्तीय सुविधा थप गर्ने योजना रहेको उल्लेख गरेको छ।

यस सेवाले भैरहवा तथा आसपासका ग्राहकहरूलाई सहज वित्तीय पहुँच प्रदान गर्ने विश्वास बैंकले लिएको छ।