काठमाडौं । प्रविधिको क्षेत्रमा द्रुत विकास हुँदै गर्दा, अब तस्विर बनाउनका लागि विशेषज्ञताको आवश्यकता पर्नै छैन। मिडजर्नी, माइक्रोसफ्ट कोपाइलट, र गुगल जेमिनार्ईजस्ता उन्नत प्रविधिहरूले जो कोहीलाई सजिलैसँग तस्विर सिर्जना गर्न सक्षम बनाइसकेका छन्। यही क्रममा, ह्वाट्सएपले पनि एउटा नयाँ फिचर ल्याउन लागेको छ, जसले च्याटमा सीधै एआईको मद्दतले तस्विर बनाउन सजिलो बनाउनेछ।

वाबेटाइन्फोको रिपोर्ट अनुसार, ह्वाट्सएपले च्याट एट्याचमेन्ट मेनुमा नयाँ सर्टकटको परीक्षण गरिरहेको छ, जसले प्रयोगकर्ताहरूलाई केही सेकेन्डमै आर्टिफिसियल इन्टेलिजेन्सको मद्दतले तस्विर बनाउन सक्ने सुविधा दिनेछ। यो सुविधा मेटा एआईको प्रयोगमा आधारित हुनेछ, जुन जटिल प्रश्नहरूको जवाफ दिन, जानकारी प्रस्तुत गर्न, र समस्याहरू समाधान गर्न सक्षम छ।

हाल, मेटा एआई च्याट वा ग्रुप च्याटमा विशेष कमाण्ड प्रयोग गरेर तस्विर बनाउन सकिन्छ। तर, ह्वाट्सएपको नयाँ फिचरले यो प्रक्रियालाई अझ सरल र सहज बनाउनेछ। च्याटमा फाइल अट्याच गर्ने स्थानमा नयाँ बटन थपिनेछ, जसले तपाईलाई च्याटमै सीधै एआईको सहयोगमा तस्विर बनाउन मद्दत गर्नेछ।

अब, तपाईले च्याटमा कुनै पनि शब्द लेखेर त्यसको आधारमा सम्बन्धित तस्विर बनाउन सक्नुहुनेछ। यसले समयको बचत गर्नका साथै च्याटमा तस्विर प्रयोग गर्न चाहनेहरूका लागि सुविधा थप गर्नेछ। ह्वाट्सएपको यो नयाँ फिचरले च्याट अनुभवलाई नयाँ उचाइमा पुर्याउने अपेक्षा गरिएको छ।

तस्विर बनाउन कसरी गर्ने?

तपाईं ह्वाट्सएप च्याटमा मेटा एआईको सहयोगमा सजिलै तस्विर बनाउन सक्नुहुन्छ। एआईले तपाईंले टाइप गरेको प्रॉम्प्ट र सन्देशको आधारमा तस्विरहरू सिर्जना गर्छ। यस सुविधा प्रयोग गर्न निम्न चरणहरू पालना गर्नुस्:

1. च्याट खोल्नुहोस्: जसमा तपाईं एआई तस्विर सिर्जना गर्न चाहनुहुन्छ।
2. @ टाइप गर्नुहोस्: र त्यसपछि /imagine क्लिक गर्नुहोस्।
3. प्रॉम्प्ट लेख्नुहोस्: सन्देश फिल्डमा आफ्नो टेक्स्ट प्रॉम्प्ट टाइप गर्नुहोस्।
4. सन्देश पठाउनुहोस्: तस्विर च्याटमा देखिनेछ।

एआई तस्विर अपडेट गर्ने तरिका

यदि तपाईंले पहिले नै सिर्जना गरेको एआई तस्विर अपडेट गर्न चाहनुहुन्छ भने, तलका चरणहरू पालना गर्न सक्नुहुन्छ:

1. च्याट खोल्नुहोस्: जहाँ तपाईंले एआई तस्विर सिर्जना गर्नुभएको थियो।
2. मेनुमा क्लिक गर्नुहोस्: एआई तस्विरको छेउमा रहेको मेनुमा क्लिक गर्नुहोस्।
3. रिप्लाई चयन गर्नुहोस्: अनि नयाँ टेक्स्ट प्रॉम्प्ट टाइप गर्नुहोस्।
4. सन्देश पठाउनुहोस्: अपडेट गरिएको तस्विर च्याटमा देखिनेछ।