काठमाडौं, चैत १७ – इन्डियन प्रिमियर लिग (आईपीएल) मा रोयल च्यालेन्जर्स बैंगलोर (आरसीबी) ले चेन्नई सुपर किङ्स (सीएसके) लाई ५० रनले पराजित गर्दै अपराजित यात्रालाई कायम राखेको छ।
चेन्नईको घरेलु मैदान एमए चिदाम्बरम स्टेडियममा टस हारेर पहिला ब्याटिङ गरेको आरसीबीले निर्धारित २० ओभरमा ७ विकेटको क्षतिमा १९६ रन बनायो। कप्तान रजत पाटिदारको ५१ रनको अर्धशतकीय इनिङ्स आरसीबीका लागि निर्णायक बन्यो।
आरसीबीको सशक्त ब्याटिङ प्रदर्शन
ओपनर फिल साल्ट र विराट कोहलीले बलियो सुरुआत गर्दै क्रमशः ३२ र ३१ रन बनाए। देवदत्त पाडिकल (२७), लियम लिभिङस्टोन (१०), जितेश शर्मा (१२), टिम डेभिड (२२) को योगदानले आरसीबीको स्कोर १९६ रनसम्म पुर्यायो।
चेन्नईका बलरमध्ये नुर अहमदले ३ विकेट, माथेसा पाथिरानाले २ विकेट, जबकि खलिल हमिद र रविचन्द्रन आश्विनले १–१ विकेट लिए।
चेन्नईको लक्ष्य पछ्याउने प्रयास असफल
१९७ रनको लक्ष्य लिएर मैदानमा उत्रिएको चेन्नई सुपर किङ्स २० ओभरमा ८ विकेट गुमाउँदै १४६ रनमै रोकियो।
ओपनर रचिन रविन्द्रले सर्वाधिक ४१ रन बनाए, जसमा ५ चौका सामेल थिए। रविन्द्र जडेजाले २५ रन बनाए भने शिवम् दुबे (१९), धोनी (३०) र आश्विन (११) ले टिमलाई उकास्ने प्रयास गरे पनि पर्याप्त भएन।
आरसीबीका बलरमध्ये जोस ह्याजलवुडले ३ विकेट लिए, जबकि यश दयाल र लियम लिभिङस्टोनले समान २–२ विकेट लिए।
आरसीबी शीर्ष स्थानमा
लगातार दोस्रो जितसँगै आरसीबी २ खेलमा २ जितसहित अंक तालिकाको शीर्ष स्थानमा उक्लिएको छ। पहिलो खेलमा आरसीबीले कोलकाता नाइट राइडर्सलाई ७ विकेटले पराजित गरेको थियो।
चेन्नईका लागि भने यो पहिलो हार हो। पहिलो खेलमा मुम्बई इन्डियन्सलाई ४ विकेटले हराएको चेन्नईले दोस्रो खेलमा भने अपेक्षाकृत प्रदर्शन गर्न सकेन।
लेखकको बारेमा
प्रतिक्रिया