रमेश ऐडी

धनगढी। सुदूरपश्चिम महोत्सव मंसिर २२ गतेदेखि हुने भएको छ। आयोजक आयोजक कैलाली उद्योग बाणिज्य संघले आज पत्रकार सम्मेलन गर्दै १७ औं संस्करणको सुदूरपश्चिम महोत्सब मंसिर २२ गतेदेखि पुष २ गते सम्म संचालन हुने जानकारी गराएको हो। आयोजकका अनुसार दुई करोड लागतमा आयोजना गरिएको उक्त महोत्सवमा करिब १० करोडको कारोबार हुने अनुमान गरिएको छ। धनगढी उपमहानगरपालिका वडा न. १ पशुपति टोल कडा सुरक्षामा संचालन हुने महोत्सवमा व्यावसायीक कृषि प्रदर्शनी, ताजा तरकारी र कृषिमा आएको प्रविधि संगै माछा,केरा,पोल्टी,दुग्धजन्य पदार्थ,च्याउ जस्ता कृपी उपजलाई विशेष जोड दिइने कैलाली उद्योग बाणिज्य संघका अध्यक्ष पुप्पराज कुवँरले बताए । उनले भने, ‘महोत्सवले उत्पादन गरेका कलाकारहरुले आज देश विदेशमा ख्याती कमाइरहेका छन् । यस बर्षको महोत्सवमा पनि संस्कृतिमा सम्भावना भएका र योगदान दिएका कलाकारहरुलाई स्टेजमा प्राथमिकता दिने छौं । साथै यस क्षेत्रका उद्यमी व्यवसायीका उत्पादनहरु लाई प्राथमिकता दिइने छ।’ महोत्सवमा ४ सय जति स्टलहरु रहनेछन् भने त्यी स्टलमा कृषि,जडिवुटी,हस्तकला,फर्निचर,अटोमोवाइल्स,गारमेन्ट, होटेल र सुचना प्रविधिजन्य वस्तु तथा सेवाहरु प्रकार रहनेछन। करिब ५ लाख व्यक्तिले अवलोकन गर्ने अनुमान गरिएको महोत्सवमा स्थानीय उत्पादन र महिला उद्यमीलाई प्रोत्साहन गरिने उल्लेख गरिएको छ । महोत्सव अवलोकनको लागि विद्यार्थीलाई ५० र सर्वसाधारणलाई १०० रुपीयाँ टिकट निर्धारण गरिएको छ । फरक क्षमता भएकालाई निःशुल्क अवलोकनको व्यवस्था मिलाइएको छ ।