काठमाडौँ। साउदी अरबका क्यारेफोर आउटलेटहरूमा काम गर्ने आप्रवासी श्रमिकहरू आर्थिक, शारीरिक र मानसिक शोषणको शिकार भएको एम्नेस्टी इन्टरनेसनलको प्रतिवेदनले देखाएको छ। नेपाल, भारत, र पाकिस्तानका श्रमिकहरूले सन् २०२१ देखि २०२३ सम्म काम गर्दा दुव्र्यवहार र अत्यधिक श्रमको सामना गरेका छन्। यी श्रमिकहरूले आफ्ना देशमा भर्ती एजेन्टलाई औसत १,२०० अमेरिकी डलर तिरेर रोजगारी पाएका थिए, जसका लागि उनीहरूले उच्च ब्याजदरमा ऋण लिनु परेको थियो, जबकि साउदी कानुनले यस्तो शुल्क लिन निषेध गरेको छ।

अध्ययनमा सहभागी श्रमिकहरूले साउदी अरबमा कडा परिश्रमको सामना गरेका छन्। उनीहरूलाई हप्तामा ६० घण्टासम्म काम गर्नुपर्ने, कहिलेकाहीँ १६ घण्टासम्म श्रम गर्नुपर्ने, र दैनिक २० किलोमिटरभन्दा बढी हिँड्नुपर्ने बाध्यता रहेको प्रतिवेदनमा उल्लेख छ। विशेष गरी रमजानको महिनामा र ‘तलब सप्ताह’को समयमा अत्यधिक कामको चाप परेको पाइन्छ।

मानव अधिकारको दृष्टिकोणबाट यो अवस्थाले आप्रवासी श्रमिकहरूको जीवनस्तरमा ठूलो नकारात्मक प्रभाव पारेको छ। फ्रान्सेली खुद्रा कम्पनी क्यारेफोरको नाममा सञ्चालन हुने यी आउटलेटहरूमा श्रमिकहरूलाई न्यून पारिश्रमिक दिइएको र कडा श्रमको दुरुपयोग गरिएकोले अन्तर्राष्ट्रिय स्तरमा गम्भीर चासो उत्पन्न भएको छ।

लेखकको बारेमा

अर्थलगानी