काठमाडौँ। नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा पर्यटनको विकासका लागि पर्यटकीय पूर्वाधारको विकास अत्यन्तै आवश्यक रहेको बताएका छन्।

सिक्लेस महोत्सवको अवसरमा बोल्दै उनले पर्यटनलाई आर्थिक विकासको महत्वपूर्ण स्रोतका रूपमा प्रस्तुत गर्दै सिक्लेस क्षेत्रको विकासमा नयाँ केवलकार निर्माणले ठूलो योगदान पुर्याउने आशा व्यक्त गरे। माघे सङ्क्रान्ति मेला–२०८१ तथा सिक्लेस युवा क्लबको ३० औं वार्षिकोत्सव समारोहमा उनले भने, “सिक्लेसमा केवलकारको निर्माणले यस क्षेत्रको पर्यटनमा नयाँ आयाम थप्नेछ र यसले सामाजिक, आर्थिक र सांस्कृतिक विकासमा महत्वपूर्ण भूमिका निर्वाह गर्नेछ।”

उनले सिक्लेसमा पर्यटनको सम्भावनालाई उजागर गर्दै, उक्त क्षेत्रको आर्थिक समृद्धिका लागि पर्यटनको भूमिका अत्यधिक महत्त्वपूर्ण रहेको बताए। नयाँ केवलकारले सिक्लेसदेखि कोरीसम्मको यात्रा थप सुलभ बनाउने छ र यसले पर्यटनमा नयाँ वृद्धि ल्याउने उनले विश्वास व्यक्त गरे।

सूचना तथा सञ्चार प्रविधि मन्त्री पृथ्वी सुब्बा गुरुङले पनि मेलामा सहभागी हुँदै पर्यटनलाई आर्थिक विकासको आधारको रूपमा व्याख्या गरे। उनले सरकार पर्यटन क्षेत्रको पूर्वाधारको विकास र सहजीकरणका लागि सधैं तयार रहेको बताएका छन्।

सिक्लेस, कास्की जिल्लामा स्थित एक प्रमुख पर्यटकीय गन्तव्य हो, जहाँ अन्नपूर्ण र लमजुङ हिमश्रृंखला देख्न सकिन्छ। सिक्लेस पोखराबाट लगभग ४० किमि दुरीमा अवस्थित छ।